Muaji janar në Bunk’Art 2: Vizita diplomatike dhe turistë nga mbarë bota

Janari ka qenë një muaj i mbushur me aktivitete dhe vizita të veçanta në Bunk’Art 2, duke theksuar rolin e muzeut si një destinacion kryesor kulturor dhe historik në Tiranë. Ndër këto vizita, spikasin ato të përfaqësuesve të rëndësishëm diplomatikë, të cilët patën mundësinë të eksplorojnë nga afër historinë komplekse të Shqipërisë.

Muzeu mirëpriti Ambasadorin e Filipineve në Shqipëri, z. Neal Imperial, i cili, i shoqëruar nga Konsulli i Nderit Shqiptar, vizitoi ekspozitat që dokumentojnë mekanizmat e survejimit dhe represionit gjatë regjimit totalitar.

Po ashtu, në ditët e fundit të janarit, Bunk’Art 2 pati kënaqësinë të mirëpresë Nancy VanHorn, të Ngarkuarën me Punë të Ambasadës së Shteteve të Bashkuara në Shqipëri. Gjatë vizitës së saj, VanHorn shprehu interes të veçantë për pavionet që trajtojnë rolin e strukturave të Sigurimit dhe ndikimin e tyre në jetën e përditshme të qytetarëve shqiptarë.

Përveç vizitave diplomatike, Bunk’Art 2 ka tërhequr gjatë janarit turistë nga e gjithë bota, të cilët mbeten të befasuar nga mënyra unike e prezantimit të historisë dhe nga mundësia për të eksploruar nga afër një prej periudhave më sfiduese të Shqipërisë. Me ekspozitat dhe historinë e të tij, muzeu vazhdon të mbetet destinacion unik dhe një hapësirë reflektimi për të gjithë vizitorët.