Keni menduar ndonjëherë si dukej shtëpia e një familje shqiptare në të kaluarën? Zbuloni “Shtëpinë Socialiste” në Bunk’Art 1

Një nga dhomat më të veçanta në Bunk’Art 1 është pa dyshim “Shtëpia Socialiste” – një rikrijim autentik i një banese shqiptare gjatë regjimit. Arredimi dhe atmosfera pasqyrojnë jetesën e thjeshtë të viteve '60-'80, ku çdo objekt rrëfen një copëz nga përditshmëria e shqiptarëve në realitetin e ashpër të diktaturës komuniste. Nga divanet me pëlhurë të trashë te televizori bardhë e zi, nga qilimat me motive tradicionale te bufetë prej druri, gjithçka të kthen pas në kohë, duke sjellë ndjesinë e ngrohtësisë familjare, por edhe kufizimet e jetës socialiste.

Shtëpia ka qenë gjithmonë zemra e familjes shqiptare, edhe në periudha kur pronësia private ishte e kontrolluar dhe ndarja e banesave bëhej me leje partie. Mobiliet identike në çdo shtëpi dhe ndjesia e thjeshtësisë së imponuar janë të gjitha pjesë e kësaj eksperience që tashmë është kthyer në kujtim.

Vizito Bunk’Art 1 dhe zbulo nga afër “Shtëpinë Socialiste”,një dhomë që të fton të kujtosh, të reflektosh dhe të kuptosh më shumë nga jeta në Shqipërinë e së shkuarës.